O concelleiro de Desenvolvemento Local e Turismo, Pablo Vizoso, contou que “este ano o Concello de Ribadeo retoma, despois desta época complexa derivada da crise sanitaria do covid, o famoso concurso gastronómico Ribadeo de Tapeo, que chega á súa décimo quinta edición”.
O edil ribadense dixo que “este evento que viña colleitando éxito ano tras ano, é un escaparate e unha oportunidade para difundir a nosa gastronomía, ademais do bo facer dos profesionais da hostalaría ribadense.Converténdose esta cita nunha das mellores plataformas gastronómicas, un espazo onde compartir novas ideas e propostas desta cociña en miniatura e fomentar a nosa cultura da tapa, tan típica de Ribadeo. En definitiva, é un dos grandes atractivos da programación que pretende ser un revulsivo para a economía ribadense”.
O concurso dará comezo o 14 de maio e prolongarase ata o día 22 de maio. O prazo de inscrición para os establecementos hostaleiros remata o 11 de abril.
Vizoso Galdo explicou que “como novidade esta edición contará cunha fase previa. As semanas anteriores á celebración do evento gastronómico un/unha cociñeiro/a especializado na materia, degustará as tapas presentadas ao concurso. Este fase terá simplemente un carácter de intercambio de impresións da elaboración e presentación das propostas desta cociña en miniatura”. O prezo da tapa será de 2 euros.
Selección e premios do xurado: A estes premios concorrerán todos os estabelecementos inscritos no concurso. A organización resérvase a posibilidade de realizar dúas quendas de selección. Unha primeira onde se escollerán os establecementos finalistas e outra quenda onde se escollerán os premiados.
Premios do público: Como en edicións anteriores, concorrerán todos os estabelecementos inscritos no concurso e os gañadores serán elixidos polo público.
O concelleiro de Desenvolvemento Local subliñou que “os gañadores do concurso recibirán agasallos especiais e publicidade gratuíta ata a próxima edición de 2023, onde se indicará que as súas tapas foron premiadas, polo público ou xurado, na XV Edición do Ribadeo de Tapeo. Esta servirá para premiar o esforzo, iniciativa e profesionalidade dos nosos hostaleiros”.