Máis de 50 homes e mulleres forman o reforzo de persoal co que conta o Concello de Ribadeo para este verán de 2016 para os departamentos de Praias, Turismo, Desenvolvemento Local e Medio Ambiente. Durante esta tempada 19 socorristas e 3 técnicos sanitarios están a vixiar as praias ribadenses e 7 persoas encárganse da limpeza dos areais. Ademais outras 3 foron contratadas para a limpeza e atención dos baños de As Catedrais. O servizo de Medio Ambiente foi reforzado con 15 traballadores durante o verán e o de Turismo e Desenvolvemento Local está composto en total por 8 persoas.
O alcalde, Fernando Suárez, subliñou “o importante esforzo económico que realizou o Concello para prestar o mellor servizo ao longo destes meses nos que Ribadeo recibe a milleiros de visitantes. Non podemos descoidar o traballo diario e ademais debemos incrementalo polo aumento de poboación que rexistra Ribadeo. Este reforzo será o encargado de manter en perfectas condicións o casco vello, as praias, a vila, as parroquias, o noso albergue, etc… eles e elas forman parte dos departamentos de Praias, Turismo e Medio Ambiente”.