O Centro de Información ás Mulleres de Ribadeo atendeu durante o 2008 un total de 376 consultas, o que se corresponde con 312 persoas que demandaron información e asesoramento (algunhas varias veces ou varias consultas, por iso hai máis consultas que consultantes). Segundo a responsable do CIM, Luisa González, “a área de asesoramento xurídico foi  a  mais demandada  con 213 consultas, seguida da área psicóloxica con 87 consultas e a área de recursos con 46. As consultas que nos veñen relativas a emprego son derivadas á area de desenvolvemento local”.

Na área xurídica, o máis demandado foi o Dereito de Familia  con 60 consultas que veñen a ser o 28,6% e especificamente as que teñen que ver con información e asesoramento sobre os procesos de separación e divorcio, e tamén houbo un aumento significativo nas consultas relacionadas coa filiación. Séguelle o Dereito Penal como consulta máis demandada, “a diferenza doutros anos onde era a asistencia xurídica gratuita a que ocupaba o segundo lugar desprázase este ano cara un 3º posto. As consultas de Dereito Penal versan maioritariamente sobre a violencia de xénero e o impago de pensións alimenticias, foron 44 consultas que supoñen o 18,7% do total. Mencionar respecto ao impago de pensións alimenticias, que ten duas formas de reclamarse pola via penal (que se fai menos veces xa que leva aparelado penas de privación de liberdade) e pola via civil que se fai no  marco da execución de sentencia do divorcio ou separación ou ben interpondo demanda de custodia”, engade Luisa González. Houbo 38 persoas que ao longo do 2008 solictaron a asistencia xurídica gratuita.

No eido laboral, a maioría das cosultas teñen que ver coas condicións na contratación. Luisa González explica que “das 312 persoas que solicitaron información e asesoramento 82 eran inmigrantes, o que supón un 26,2% do total. No 2007 foron 57 persoas inmigrantes o que reflicte un notable ascenso da población inmigrante no uso deste  servizo. Respecto a tipoloxía das consultas, maioritariamente son de carater persoal… 270 consultas foron persoais, 36 telefónicas…”. As persoas que máis usan este servizo atópanse no tramo de idade que vai dos 26 aos 35 anos, seguíndolle o tramo dos 46 até os 55 anos. Luisa González engade que “podemos decir que xenéricamente, segundo os datos do programa de estadísticas do Servizo Galego de Igualdade, as persoas que acuden a este servizo teñen as seguintes caraterísticas: son mulleres cunha idade entre 26- 35 anos, con fillos/as, do núcleo urbán, casadas, con estudos medios, traballadoras  e con ingresos familiares que oscilan entre os 600-900€”.

A concelleira de Muller, Mariluz Álvarez Lastra e a responsable do CIM, Luisa González fixeron tamén balance das políticas de igualdade que se veñen desenvolvendo desde o Concello de Ribadeo e sinalaron que “seguimos facendo campañas de dinamización e de sensibilización cara a cidadania e mantemos os bonos axuda para fomentar a conciliación da vida laboral e persoal das mulleres que son nais. Seguimos a realizar o boletín Ribadeo Muller no que se recollen todas as actividades que facemos ao longo do ano e onde se dan consellos sobre temas de interes para as mulleres. É unha publicación que chega a todas as casas. Continúa tamén o Consello Municipal da Muller que é un órgano que fomenta a participación e que é un vehículo central de comunicación entre o Concello, as parroquias e o movimento asociativo das mulleres”. Álvarez Lastra e González engadiron que “levamos adiante a abordaxe da violencia de xénero mediante a elaboración dun protocolo de prevención e atención ás mulleres víctimas desta problemática, realizamos varias xornadas ao longo do ano dirixidas a sectores específicos e tamén um estudio sobre a percepción que ten a cidadanía de Ribadeo sobre a violencia de xénero”. O CIM organizou ao longo do 2008 actividades coma talleres de relaxación para bebés ou natación terapéutica, charlas sobre temas de actualidade coma a do cancro de útero e un obradoiro de medio ambiente nas Anzas.