Otero Cabarcos declarou que “no Concello de Ribadeo estamos encantados de poder recuperar as Xornadas Mar por Medio, que terán lugar no auditorio municipal Hernán Naval o vindeiro mes de setembro. Desde o Concello sempre apoiamos estas iniciativas históricas e culturais”.
A Academia Xacobea, en colaboración coa Xunta de Galicia, a Universidade de Santiago, a Deputación de Lugo e o Concello de Ribadeo, organiza as XVII Xornadas Xacobeas Mar por Medio nas que estará presente e participará como conferenciante o hispanista británico John Rutherford, impulsor e difusor desta cita en anteriores edicións.
A inscrición para asistir ás Xornadas Mar por Medio abrirase o 20 de xullo na web da Academia Xacobea.
Durante os tres días que durarán as xornadas haberá táboas redondas, unha exposición sobre a Ruta Xacobea e interpretacións musicais, todo relacionado co Camiño de Santiago e co fenómeno Xacobeo. A esta edición acudirán como conferenciantes persoas do ámbito universitario, da comunicación, da cultura, da igrexa, da administración e da propia Academia, todas elas expertas coñecedoras e difusoras do mundo Xacobeo.