Máis de 200 estudantes de 3º e 4º da ESO e FP reciben en Ribadeo talleres de educación afectivo-sexual para previr a violencia de xénero.
Un ano máis ao redor de 200 estudantes de 3º e 4º da ESO participaron nos talleres de educación afectivo-sexual impartidos pola educadora social Noelia Moreau Castro, do gabinete especializado Con Mucho Gusto. Estas sesións, organizadas polo Centro de Información á Muller (CIM) en colaboración cos centros educativos do municipio, forman parte do programa municipal O Concello cos coles, e teñen como principal obxectivo previr a violencia de xénero e, en especial, as condutas sexuais violentas.
Os obradoiros abordaron temas clave para fomentar relacións afectivas sas e respectuosas. A través dun enfoque dinámico e adaptado ás súas inquietudes, o alumnado tivo a oportunidade de reflexionar sobre temas como a igualdade de xénero, os estereotipos sexistas, o consentimento e as emocións.
Segundo destacou a Concelleira de Igualdade, Begoña Sanjurjo, “é fundamental formar ás novas xeracións en valores de respecto, igualdade e tolerancia” .
A participación activa e o interese mostrado polo alumnado reflicten a importancia de abordar estas cuestións desde unha idade temperá. “Estes talleres non só buscan previr condutas violentas, senón tamén proporcionar ás novas ferramentas para xestionar as súas emocións e identificar relacións tóxicas”, sinalou a edil ribadense.