O concelleiro David Rivas deulles a benvida: “hoxe é o voso día. Hoxe é o día no que desde o Concello queremos render unha merecida homenaxe a todos os equipos ribadenses que tivéstedes algún éxito a pasada tempada, que sodes moitos”. O edil de Deportes dixo: “porque cada ano sodes máis, pero tamén cada ano que pasa sodes mellores. 230 deportistas de 13 modalidades deportivas, atletismo, automobilismo, baloncesto, billarda, bolos, fútbol sala, fútbol, piragüismo, remo, surf, tiro, tenis de mesa e ximnasia rítmica, entre os que celebramos medallas de ouro, prata e bronce en campionatos de España, galega, ascensos de categorías, títulos provinciais e comarcais. Todo grazas á implicación de todas e todos vos, de deportistas, adestradoras e adestradores, de directivas, pero tamén das familias, pais, nais, parellas, que sempre están aí, apoiando de xeito incondicional, celebrando as vitorias, sufrindo as derrotas, madrugando, viaxando as fins de semana… esta gala tamén á para vós”.
Rivas engadiu que “grazas a esa dedicación desinteresada Ribadeo pode presumir de ser un referente deportivo, con 40 clubs, 18 escolas municipais e 600 nenos e nenas entre 4 e 14 anos vinculados a algunha disciplina deportiva. Por isto, aínda que os éxitos deportivos non acompañaran, poderiamos ter a satisfacción de estar facendo un traballo ben feito”.
O concelleiro de Deportes, que explicou que a data de celebración da III Gala do Deporte se retrasou ata a xornada de onte para que todos os clubs tivesen rematada a súa tempada e así todos e todas puidesen estar presentes, rematou a súa intervención pedíndolles a tod@s @s deportistas que “disfrutedes co que facedes, que iso é o principal, de cada adestramento e de cada vitoria, e que vos levantedes despois de cada derrota. Disfrutade do deporte que escolléstedes e que vos axuda a formarvos como persoas. E por suposto, disfrutade desta Gala, que a facemos por e para vós”.
O pavillón encheuse para presenciar a III Gala do Deporte e tod@s @s deportistas recibiron a súa estatuíña. Xunto a David Rivas e ao alcalde de Ribadeo, Fernando Suárez, estiveron tamén @s concelleir@s Ana Martínez, Sonia Meilán, Mariluz Álvarez, Vanesa Yanes, Paz Ermida e Jorge Díaz.