O grupo Saudade de Ribadeo participou onte en Santiago no café da memoria do Museo do Pobo Galego, que estaba adicado ás gaiteiras. Ata alí se desprazaron Mari Beni Cubero Loredo, Conchita Redondo Lastra, Mª Teresa Rodríguez Ruíz e Mª Carmen Rodríguez Ruíz, que compartiron as súas experiencias coa percusionista do grupo Os Rosales de Rianxo, Maruxa Miguéns Lustres.
Segundo explican desde a Concellaría de Igualdade de Ribadeo “o café da memoria é unha cita que se fai unha vez ao ano e que está dedicada ás persoas maiores que resaltaron nalgún eido”. Medio cento de persoas se achegaron ao Museo do Pobo Galego a disfrutar deste intercambio de opinións e vivenzas, “deses relatos daquelas e daqueles que son fonte viva da historia recente e que nos axudan a interpretar o mundo no que vivimos”.