O Ministerio de Medio Ambiente, e Medio Rural e Marino ven de anunciar a licitación das obras de demolición e recuperación medioambiental da enseada da Vilavella, a senda peonil de conexión coas aceas e a rehabilitación dos muiños de marea e de regato. O orzamento ascende a 3.263.288 euros e o prazo de execución será de 18 meses. As empresas interesadas poden presentar as súas ofertas económicas ata o 20 de maio.
O alcalde de Ribadeo, Fernando Suárez, destaca “moi positivamente que no día de hoxe saia no BOE o anuncio de licitación destas obras. É positivo porque culmina un traballo de moitos anos que estaba atascado por diferentes problemas, e que nosoutros con moitas penalidades conseguimos pagar o importe dos terreos hai uns meses. Éste foi o elemento necesario para que se desbloqueara todo este asunto”. Suárez Barcia sinala que “o máis importante para Ribadeo é que vai ser unha actuación dunha envergadura grande, unha actuación coa que penso que Ribadeo se abre algo máis ao mar, á ría. Era algo que moitísima xente de Ribadeo descoñecía todos eses paraxes maravillosos da zona da Vilavella e que cando esto estea executado poderáse ir andando desde a praia de Os Bloques ata a enseada das aceas onde está o muiño que se verá recuperado desde o punto de vista etnográfico”.
O rexedor engade que esta obra suporá “un punto moi importante de cara ao turismo de calidade. Esa xente que se achegue a Ribadeo poderá ver estes diferentes ángulos e puntos de vista da ría. Algo que era totalmente descoñecido e que grazas a esta ambiciosa actuación será posible”. Fernando Suárez valora “o traballo realizado pola Dirección General de Costas e confiamos en que unha vez que se abran as ofertas que será en xuño comencen xa neste 2009 as obras de execución que van durar 18 meses”.