Na sesión plenaria o alcalde deu conta “da actuación urxente que ordenei facer hai moi poucos días por unha situación de inseguridade, con posible risco de poder afectar ás persoas e a unha explotación agrícola, debido á situación na que se atopa o Río Grande despois das chuvias de hai uns meses, os danos ocasionados no seu momento non se resolveron por parte dos organismos que teñen a competencia niso, como Augas de Galicia. E por mor das chuvias de hai uns días déuse unha situación de certa perigosidade, os técnicos municipais suxeríronme a adopción de medidas inminentes de cara a preservar a seguridade pública tanto de persoas como das reses dunha explotación. As actuacións serán costeadas polo Concello para evitar males maiores, e de aí que en aplicación da lexislación vixente tiven que dar conta de maneira inmediada ao pleno na xornada de onte”.

O rexedor non quere entrar en polémicas pero subliña que “en todos os problemas ocasionados por estas chuvias que houbo nos últimos meses as diferentes administracións tiveron un comportamento desigual. O Goberno de España, ese co que a algúns estes días se lles enche a boca coas cousas que fan en Ribadeo, pouco fixo ou nada nesa materia, a Deputación fixo ben pouquiño, só durante uns días nos trouxo unhas máquinas para tapar catro baches, a Xunta fixo algo máis, pero insuficiente de aí que tivésemos que adoptar estas medidas. E ao final somos os Concellos os que sempre temos que asumir as responsabilidades que outros non asumen, pero polo menos senon fan que deixen facer”.

E por unanimidade se aprobou no pleno extraordinario de onte o protocolo de adhesión á rede de centros para a modernización  e inclusión tecnolóxica da Xunta (Rede CEMIT). Suárez Barcia lembrou que “o telecentro de Ribadeo é o que máis usuarios ten de Galicia en relación coa súa poboación. No seu momento, hai dous anos, a anterior Xunta tiña dúas persoas sen que ao Concello lle costara un peso, pero as cousas cambiaron e como moito ofrecen unha persoa financiando o 80% e o outro 20% ten que ser costeado polo Concello. É sensiblemente inferior ao anterior, pero é mellor isto que nada e por iso decidimos adherirnos a este protocolo”. O alcalde engadiu que “así poderemos seguir prestando servizo a toda esta xente, sobre todo maior, que nunca se achegou ás novas tecnoloxías, pero que da gusto ver como van con regularidade a este telecentro a disfrutar de todo o que ofrecemos. Queremos continuar dando cursiños, formación, obradoiros para poder seguir facendo labores de alfabetización dixital e que moita xente non quede desapegada deste mundo das novas tecnoloxías da información e da comunicación”.