Preto de 300 xubilados de Ribadeo visitan hoxe a Feira Internacional de Mostras do Noroeste que se celebra en Ferrol. Fano no transcurso dunha nova viaxe de “A todo tren”. Esta iniciativa, posta en marcha hai algún tempo polo Concello, vai adicada ás persoas maiores, “a todos aqueles que traballaron moito ao longo da súa vida e que agora teñen un descanso merecido”, en palabras do alcalde Fernando Suárez.
Nesta ocasión, a expedición ferroviaria para maiores terá en FIMO o seu destino, e o propio alcalde acompañará ao grupo na viaxe. O grupo disfrutará primeiro dun xantar seguido dun baile. Despois, poderán visitar a Feira de Mostras, que dedica a súa xornada de hoxe aos concellos costeiros. De feito, o alcalde sinalou que Ribadeo ten un stand turístico en Ferrol “para dar a coñecer máis o noso Concello a todo o público que acode a esta feira”.
Esta nova viaxe de A todo tren partía ás oito e media da mañá de Ribadeo cara Ferrol, e o grupo voltarán nun tren que chegará a Ribadeo contra as dez. O alcalde, Fernando Suárez, valora de xeito positivo a alta participación , e espera que “todos disfruten deste día de lecer e de compañeirismo que viviremos ata noite”.