Concello de Ribadeo

A concelleira de Cultura, Pilar Otero, agradece a colaboración da Área de Cultura da Deputación de Lugo para levar a cabo a execución das obras de acondicionamento da Casa do Viejo Pancho. A vicepresidenta, Maite Ferreiro, e a edil ribadense asinaron o convenio para ese acondicionamento.

O Concello de Ribadeo sacou a licitación o arranxo de varios camiños de Covelas, Ove, A Devesa, Arante, Cedofeita e Couxela. O investimento ascenderá a preto de 164.000 euros e as empresas interesadas poden presentar as súas ofertas ata o vindeiro 8 de outubro.

O concelleiro de Medio Ambiente, Jorge Díaz Freije, asegura que o Concello realiza tarefas de desinfección periódica en rúas e beirarrúas da vila e tamén nas parroquias, tal e como ocorreu esta semana pasada. Estes traballos enmárcanse na loita do covid-19. Ademais o edil ribadense subliña que os contedores do lixo son lavados varias veces ao ano. Neste 2020 houbo un lavado extra durante o estado de alarma, outro agora no verán e xa está previsto outro máis para outubro.

A Concellaría de Cultura comunica o aprazamento do espectáculo de danza previsto o 20 de setembro.

O Concello de Ribadeo ofrece novas experiencias turísticas, que só se poden vivir unha vez ao ano. Iso correrá do 18 ao 20 de setembro cunha edición especial da Xeoruta dos Arcos, que se realizará aproveitando unha das mareas máis grandes deste 2020. As prazas para participar están practicamente esgotadas. O edil de Turismo, Pablo Vizoso, fai unha valoración moi positiva da acollida que tivo esta iniciativa, "xa que nun par de horas comprobamos que as máis de 60 prazas ofertadas estaban case cubertas".

O concelleiro de Medio Rural, Jesús Mundiña, asegura que están a piques de rematar os traballos contratados polo Concello dentro do Plan de Tratamentos Preventivos contra Incendios Forestais, que consisten no desbroce mecanizado da faixa auxiliar en ambas marxes das vías que dan servizo ás zonas forestais. O edil tamén subliña que o Concello dispón de 2 tractores cos correspondentes equipos de desbroce que están actuando permanentemente nos máis de 260 quilómetros de camiños.