Concello de Ribadeo

Un total de 17 empresas presentaron ofertas no Concello para proceder ao equipamento e amoblamento do centro de atención a persoas maiores de Ribadeo, suxeito á regulación harmonizada, por procedemento aberto e oferta economicamente máis vantaxosa.

O festival SonRock celebrarase o vindeiro sábado, 17 de xuño, no parque de San Francisco. A partires das once da noite actuarán as bandas Enxebre, Anima e Machina. O evento foi presentado polos concelleiros de Cultura e Xuventude.

A Concellaría de Cultura fai unha valoración moi positiva da estrea de Juana o pasado sábado no Cine Teatro de Ribadeo. A performance multidisciplinar está baseada en poemas da poeta uruguaia con raíces na Mariña luguesa Juana de Ibarbourou. Esta aposta poético-musical e de danza de Marina Oural contou cunha nutrida asistencia de público, que agasallou aos intérpretes cunha sonora ovación.

A Biblioteca Municipal El Viejo Pancho acolleu nas últimas horas a entrega dos premios aos gañadores e gañadoras do Concurso de Narración e Debuxo Letras Galegas 2017, na súa fase local. No acto participaron os membros do xurado, concelleiro de Cultura, Farruco Graña, e a bibliotecaria municipal, Mª Jesús Rañón.

O Concello presentou hoxe a páxina web do arquivo municipal e ao mesmo tempo clausurou o obradoiro de emprego Ribadeo no tempo no que traballaron 16 persoas durante seis meses. Grazas ao traballo realizado polo alumnado e monitores foi posible dixitalizar, entre outros documentos, actas do Concello que datan do ano 1536. No acto que se desenvolveu na Biblioteca Municipal El Viejo Pancho participaron o cronista oficial de Ribadeo, Eduardo Gutiérrez, o director do obradoiro, Manuel Barreiro, a concelleira de Desenvolvemento Local, Ana Martínez, e o alcalde Fernando Suárez.

O alcalde, Fernando Suárez, envioulle un novo escrito á Autoridade Portuaria Ferrol-San Cibrao pedíndolle que garanta o libre acceso á Illa Pancha. O rexedor referiuse tamén ao pronunciamento efectuado por ese ente nas últimas horas sobre o hotel situado nesa paraxe: “alégranos que o procedemento de concesión estea ben, porque había preocupación na sociedade”. E lembrou que a Autoridade Portuaria tardou catro meses en emitir unha resposta a este respecto.