Concello de Ribadeo

O alcalde, Fernando Suárez, agarda que na Fase III da desescalada se permitan desprazamentos entre Ribadeo e o Occidente asturiano e viceversa. O rexedor dixo que aínda que todas as partes están de acordo non se acaban de dar pasos en firme para que isto sexa así. Lembrou que o Concello xa fixo a petición formal e agora toca que o fagan a Xunta e o Principado.

A Aula CeMIT do Concello de Ribadeo acollerá a realización de exames universitarios destinados a aquel alumnado con dificultades para examinarse online desde os seus fogares.

O Concello de Ribadeo asinou o novo contrato para o Servizo de Axuda no Fogar na modalidade de dependencia. Terá unha vixencia de tres anos e o importe ascende a 1.780.000 euros. Os usuarios e usuarias do SAF na modalidade de dependencia contarán nos seus domicilios cos servizos gratuítos de perruquería, podoloxía e fisioterapia, que son algunhas das melloras que inclúe o devandito contrato.

Os usuarios e usuarias do Hospital Asilo e do Centro de Atención a Persoas Maiores de Ribadeo están a recibir as visitas das súas familias, seguindo o protocolo de protección e hixiene correspondente. 

O Concello de Ribadeo ven de solicitarlle á Xunta que acometa os traballos de roza pertinentes no Camiño Natural do Cantábrico. O alcalde, Fernando Suárez, no escrito remitido ao Servizo de Conservación da Natureza alude ás queixas "totalmente xustificadas" por parte da veciñanza que o emprega para pasear ou para facer deporte.

A concelleira de Cultura, Pilar Otero, anima aos xoves de máis de 14 anos a participar no concurso Youtubeiros 2020. Esta cita ten como obxectivo a creación de vídeos en galego e así aumentar a presenza da nosa cultura nas redes.