Ayuntamiento de Ribadeo


Compartir:

Novas

Foto Concello

O INVESTIMENTO ASCENDERÁ A 50.000 EUROS

Espazo polivalente

17/02/2021

O Concello aposta por crear un espazo polivalente para desenvolver actividades e accións dinamizadoras nun local situado na Avenida de Asturias, que é propiedade municipal. Para a súa posta en marcha acaba de solicitar unha subvención á Xunta de Galicia, segundo deu a coñecer Pablo Vizoso, concelleiro de Desenvolvemento Local, Turismo e Comercio.

Vizoso Galdo dixo que "dende o Concello observamos a necesidade de crear un espazo polivalente que sexa aglutinador de diferentes tipos de actividades e accións dinamizadoras que cumpra os requisitos de estar situado no centro da vila, que poida dar resposta ás necesidades da cidadanía e de colectivos específicos, e que permita desenvolver actividades nos eidos da participación cidadá, da dixitalización, da igualdade de oportunidades, da promoción económica ou da cultura, entre outros".

O concelleiro de Desenvolvemento Local, Comercio e Turismo sinalou que "con este proxecto, o Concello de Ribadeo, quere dispoñer dun espazo físico para a cidadanía, un espazo polivalente no local, que xa é propiedade do Concello na Avenida de Asturias que se converta e consiga dar resposta ás necesidades nos ámbitos da formación dixital, por exemplo, e tamén na participación cidadá ou asociativa. Neste local, que estaría dotado de equipamento avanzado e adaptado ás necesidades actuais, poderíamos promover un espazo para a veciñanza e tamén das empresas e autónomos xa que se podería ceder para a celebración de encontros, reunións, cursos, conferencias.  Permitiría desenvolver actividades culturais, de promoción da igualdade, que fomenten a integración interxeracional, ser unha sala de encontro, actividades de fin de semana".

Pablo Vizoso engadiu que "a valoración económica do proxecto achégase practicamente aos 50.000 euros. Para poder facelo, contemplamos nos orzamentos deste ano unha partida con este fin e poder iniciar as obras. Agardamos que a Xunta de Galicia atenda a nosa petición, a través da participación nesta convocatoria de axudas, e nos próximos meses poidamos poñen en marcha este proxecto tan importante en diferentes ámbitos".

+ Noticias




© 2008 Concello de Ribadeo