Concello de Ribadeo


Compartir:

Novas

Foto Ivan Lindin

O DEPORTISTA AGRADECEU O RECOÑECEMENTO

Recepción a Iván Lindín

06/03/2015

O salón de plenos do Concello acolleu a recepción por parte do alcalde, Fernando Suárez, ao veciño de Vilaframil Iván Lindín Rodil, como recoñecemento aos seus méritos deportivos, xa que foi campión de España de tiro olímpico na modalidade de carabina de aire en decembro de 2014 e subcampión en febreiro deste 2015. Iván Lindín estivo acompañado no acto por varios familiares e tamén asistiu o técnico de Deportes do Concello, Iván López Rodríguez.

O rexedor municipal explicou que a recepción celebrada este mediodía foi "un sinxelo, pero emotivo ao mesmo tempo, acto de recoñecemento á actividade deportiva deste ribadense que está levando o nome da súa parroquia e do seu concello polo Estado adiante e esperamos que dentro de pouco sexa polo mundo adiante. Ribadeo é un sitio onde temos moitos deportes e un deporte base que cada vez está indo a máis, pero ata agora non tiña grandes estrelas internacionais, pero a partir de agora polo menos a nivel estatal empezamos a despuntar; e un bo exemplo témolo en Iván por dobre motivo: pola súa puntería e polo seu traballo durante todo este tempo, pero tamén porque compite dunha maneira un pouco máis limitada xa que ten unha discapacidade que fai máis meritorio aínda as cotas a onde está chegando".

Fernando Suárez engadiu que Iván Lindín "no 2014 quedou campión de España en tiro en pé con carabina de aire e sexto en tiro deitado; e no campionato de España deste ano 2015, que se disputou en Madrid en febreiro, clasificouse segundo en tiro en pé con carabina de aire e quinto en tiro tombado. Ademais, e por iso dicía o da progresión meteórica internacional de Iván, a mediados deste mes vai asistir a unha concentración cun grupo de alta competición en Bilbao para intentar ser seleccionado para unha das dúas próximas probas da Copa do Mundo en Alemaña ou en Polonia. Eu, como alcalde, o goberno municipal e toda a corporación desexámosche que sexas seleccionado e acudas a unha Copa do Mundo, que sería unha honra para todos os veciños e veciñas de Ribadeo por ter unha persoa que está chegando a unhas cotas importantes no mundo do deporte".

Despois de recibir uns agasallos de mans do alcalde, Iván Lindín agradeceu este recoñecemento do Concello e comentou que "chegar a competir en Europa está aí, pero o soño é chegar a unha olimpíada. A día de hoxe non teño marcas para ir a unha olimpíada, pero quédanme 5 anos aínda para chegar a elas, polo que pode conseguirse e espero logralo".

Ademais Iván Lindín aproveitou para reivindicar axudas: "este tipo de deportes minoritarios non soen ter ese recoñecemento que se lle dá a outros, pero ademais é caro para practicar e moi caro para competir, sobre todo polos longos desprazamentos para ir aos campionatos".

+ Novas




© 2008 Concello de Ribadeo